వృషకర్మ ట్రైలర్ డేట్ ఫిక్స్! నవంబర్ 25న రానున్న నాగ చైతన్య మైథలాజికల్ థ్రిల్లర్ ట్రైలర్, వాయిదా లేనట్టే
Image: Vrushakarma poster featuring Naga Chaitanya, via Disha Daily
నాగ చైతన్య అభిమానుల నిరీక్షణకు తెరపడింది. ఎంతో ఆసక్తిగా ఎదురుచూస్తున్న ‘వృషకర్మ’ ట్రైలర్ విడుదల తేదీ ఖరారైంది. దీంతో సినిమా వాయిదా పడుతుందంటూ వస్తున్న పుకార్లకు ఫుల్స్టాప్ పడింది. నవంబర్ 25న ట్రైలర్ విడుదల కానుండగా, ఆ రోజు నుంచి డిసెంబర్ 4న సినిమా విడుదలయ్యే వరకు భారీ స్థాయిలో ప్రమోషన్లు నిర్వహించేందుకు చిత్ర బృందం ప్లాన్ చేస్తోంది. డిసెంబర్ 3 రాత్రి నుంచే ఓవర్సీస్ ప్రీమియర్లు ప్రారంభం కానుండగా, భారత్లో డిసెంబర్ 4 తెల్లవారుజాము నుంచే షోలు మొదలవుతాయి.
‘విరూపాక్ష’ ఫేమ్ కార్తీక్ వర్మ దండు దర్శకత్వంలో తెరకెక్కుతున్న గ్రాండ్ మైథలాజికల్ అడ్వెంచర్ థ్రిల్లర్ ‘వృషకర్మ’. అక్కినేని నాగ చైతన్య హీరోగా నటిస్తున్న ఈ చిత్రంలో మీనాక్షి చౌదరి హీరోయిన్గా నటిస్తుండగా, స్పర్శ్ శ్రీవాస్తవ్, జయరామ్, సత్య తదితరులు కీలక పాత్రల్లో కనిపించనున్నారు. సుకుమార్ రైటింగ్స్ మరియు శ్రీ వెంకటేశ్వర సినీ చిత్ర బ్యానర్లపై బి.వి.ఎస్.ఎన్. ప్రసాద్ ఈ చిత్రాన్ని నిర్మిస్తున్నారు. అజనీష్ లోక్నాథ్ సంగీతం అందిస్తున్నారు.
ఇప్పటివరకు విడుదలైన అప్డేట్స్ అన్నీ ప్రేక్షకులను విశేషంగా ఆకట్టుకున్నాయి. డిసెంబర్ 4న సినిమా విడుదలవుతుందని చిత్ర బృందం ముందే ప్రకటించినప్పటికీ, సినిమా వాయిదా పడుతుందనే వార్తలు సోషల్ మీడియాలో చక్కర్లు కొట్టాయి. దీంతో అభిమానులు ఆందోళన చెందారు. అయితే, ఇప్పుడు నాగ చైతన్య టీమ్ నుంచి అందిన సమాచారంతో ప్రమోషనల్ షెడ్యూల్ ఖరారైంది. నవంబర్ 25న ట్రైలర్ రానుండటంతో సినిమాపై అంచనాలు మరింత పెరిగాయి. ఈ ఏడాది అత్యంత ఆసక్తిగా ఎదురుచూస్తున్న తెలుగు చిత్రాల్లో ‘వృషకర్మ’ ఒకటి. ట్రైలర్ అంచనాలను అందుకుంటుందని మేకర్స్ నమ్మకంతో ఉన్నారు.
Source: Andhra Vilas



