தாதாசாஹேப் பால்கே சர்வதேச திரைப்பட விருதுகள் 2026: சர்வதேச ஆண்டின் சிறந்த கலைஞராக டெய்லர் ஸ்விஃப்ட் தேர்வு
Image: Taylor Swift on The Eras Tour, via Substream Magazine
நவம்பர் 20 அன்று அறிவிக்கப்பட்ட தாதாசாஹேப் பால்கே சர்வதேச திரைப்பட விருதுகள் 2026-ல், சர்வதேச ஆண்டின் சிறந்த கலைஞராக பாப் இசை நட்சத்திரம் டெய்லர் ஸ்விஃப்ட் தேர்வு செய்யப்பட்டுள்ளார். இந்திய சினிமா, ஹாலிவுட், தொலைக்காட்சி, ஓடிடி, இசை மற்றும் நகைச்சுவை என அனைத்தையும் உள்ளடக்கிய இந்த விருதுப் பட்டியலில் டெய்லர் ஸ்விஃப்ட்டின் பெயர் இடம்பெற்றிருப்பது அனைவரது கவனத்தையும் ஈர்த்துள்ளது. இந்திய நகைச்சுவையாளர் சமய் ரெய்னா ‘ஆண்டின் சிறந்த நகைச்சுவையாளர்’ விருதைப் பெற்றுள்ளார். உலகளாவிய சினிமாவில் சிறந்த பங்களிப்பிற்காக ஜேம்ஸ் கேமரூனும், சர்வதேச திரைப்படத்தில் சிறந்த இயக்குநருக்கான விருதை பால் தாமஸ் ஆண்டர்சனும் பெற்றுள்ளனர்.
திரைப்படப் பிரிவில், ‘துரந்தர்’ சிறந்த திரைப்படமாகத் தேர்வு செய்யப்பட்டது. இப்படத்திற்காக ரன்வீர் சிங் சிறந்த நடிகராகவும், அக்ஷயே கண்ணா சிறந்த நடிப்பிற்கான அங்கீகாரத்தையும் பெற்றனர். ‘சையாரா’ படத்திற்காக அனீத் படா சிறந்த நடிகையாகவும், அதே படம் ‘ஆண்டின் சிறந்த பாடல்’ விருதையும் வென்றது. இப்படத்திற்காக ஃபஹீம் அப்துல்லா சிறந்த பின்னணிப் பாடகருக்கான விருதைப் பெற்றார். ஆதித்யா தார் சிறந்த இயக்குநராகவும், ஆதித்யா தார், ஜோதி தேஷ்பாண்டே மற்றும் லோகேஷ் தார் ஆகியோர் சிறந்த தயாரிப்பாளர்களாகவும் அங்கீகரிக்கப்பட்டனர். ‘சின்னர்ஸ்’ படத்திற்காக மைக்கேல் பி. ஜோர்டான் சிறந்த சர்வதேச நடிகராகவும், ‘அவதார்: ஃபயர் அண்ட் ஆஷ்’ சிறந்த சர்வதேச திரைப்படமாகவும் தேர்வு செய்யப்பட்டன.
திரைப்படத் துறையில் சிறந்த பங்களிப்பிற்காக கமல்ஹாசனுக்கும், இசைத் துறையில் சிறந்த பங்களிப்பிற்காக இளையராஜாவுக்கும் விருதுகள் வழங்கப்பட்டன. ‘காந்தாரா: சாப்டர் 1’ விமர்சகர்களின் சிறந்த திரைப்படமாகத் தேர்வு செய்யப்பட்டது. ரிஷப் ஷெட்டி விமர்சகர்களின் சிறந்த நடிகராகவும், யாமி கௌதம் தார் விமர்சகர்களின் சிறந்த நடிகையாகவும் விருதுகளை வென்றனர். தொலைக்காட்சி மற்றும் ஓடிடி பிரிவில், ‘தாரக் மேத்தா கா ஊல்டா சஷ்மா’ ஆண்டின் சிறந்த தொலைக்காட்சித் தொடராகத் தேர்வு செய்யப்பட்டது. ‘தி பாஸ்டர்ட்ஸ் ஆஃப் பாலிவுட்’ இணையத் தொடருக்காக ஆர்யன் கான் சிறந்த இயக்குநராகத் தேர்வு செய்யப்பட்டதோடு, அந்தத் தொடர் சிறந்த இணையத் தொடருக்கான விருதையும் வென்றது. ‘பாதாள லோக்’ தொடருக்காக ஜெய்தீப் அஹ்லாவத் சிறந்த நடிகராகவும், ‘டெல்லி கிரைம் 3’ தொடருக்காக ஷெஃபாலி ஷா சிறந்த நடிகையாகவும் தேர்வு செய்யப்பட்டனர்.
வாசகர்கள் கவனத்திற்கு, தாதாசாஹேப் பால்கே சர்வதேச திரைப்பட விருதுகள் என்பது தனியார் அமைப்பால் நடத்தப்படும் ஒரு விருது விழாவாகும். இது இந்திய அரசின் தேசிய திரைப்பட விருதுகளில் வழங்கப்படும் அதிகாரப்பூர்வ தாதாசாஹேப் பால்கே விருதிலிருந்து முற்றிலும் மாறுபட்டது. இருப்பினும், ஒரு உலகளாவிய பாப் நட்சத்திரமான டெய்லர் ஸ்விஃப்ட்டிற்கு இந்த விருது வழங்கப்பட்டிருப்பது, இந்த விருது விழாவின் பரந்து விரிந்த செல்வாக்கைக் காட்டுகிறது.
Source: Filmibeat


